Lára Stefánsdóttir

Yfirskrift fundarins er "Verk að vinna" og svo sannarlega er verk að vinna í íslenskum stjórnmálum í dag. Eftir langan tíma gamalla stjórnmálaflokka í ríkisstjórn hefur margt aflaga farið og áherslur á sömu mál verið of lengi við lýði. Enda birtist þreyta þingmanna stjórnmálaflokkanna, jafnvel þeim nýju og þeim gömlu í því að þeir nenna varla í ræðustól á þingi til að ræða mikilvæg málefni okkar sem búum á Íslandi. Jafnvel birtast þeir ekki í þingsal, þeir eru vanir að ráða, vanir að stjórna og upplifa að engum komi lengur við hvernig þeir gera hlutina nema þeim sjálfum.

Eljusemi þingflokks Samfylkingarinnar skiptir því miklu, stöðugt minna á mikilvæga málaflokka, úrbætur, breytingar og allt það sem getur stuðlað að öflugri þróun í íslensku samfélagi. Samfélagi sem á mörgum sviðum býr við stöðnun og jafnvel afturhald. Eitt sinn skipti "frelsi" máli fyrir Sjálfstæðisflokkinn, slíkt frelsi sést ekki í stöðugu eftirliti á menntakerfi landsins. Frelsið birtist ekki í viðskiptum þar sem fjármagn og fyrirtæki hafa horfið og örfáir hafa möguleika á fyrirtækisrekstri í dag. Lítil og meðalstór fyrirtæki á íslenskan mælikvarða hafa horfið hvert af öðru. Um allt land eru það sömu matvörufyrirtækin, sömu apótekin, sömu byggingavöruverslanirnar allt á hendi fárra eigenda. Þetta er ekki frelsi, þetta er heldur ekki samkeppni, þetta hét í hagfræðináminu mínu fákeppni og er í mínum huga um margt ávísun á afturhald.

Ég er því stolt af því að sitja þennan landsfund, fund fjölda manna og kvenna sem vilja vinna að úrbótum og uppbyggingu íslensks samfélags með jöfnuð manna í huga. Jöfnuð allra sem byggja Ísland í dag.

Samfylkingin skiptir ekki bara máli - hún skiptir meginmáli á Íslandi í dag.