Lára Stefánsdóttir

Ég geng nánast daglega að Lónsánni ásamt fleirum með hundinn minn. Þessi á er landamerki Akureyrar og Hörgárbyggðar og rennur meðfram Krossanesborgum en umhverfisráðherra undirritaði einmitt undir friðlýsingu þeirra sem fólkvangs um daginn. Í ána er settur klór- og sláturúrgangur og er áin því oft freyðandi af drullu og silungar þar hafa sést synda með kviðinn upp. Þetta er gríðarlega falleg á en harkalegt að þurfa að horfa upp á mengun hennar og þá hættu sem hún skapar fyrir fuglalíf, fiska og annað lífríki í nágrenni árinnar og fólkvangsins.