Lára Stefánsdóttir

Hjartað tók dulítinn kipp, ég viðurkenni það en ég var ekki viss um hvort ég hefði heyrt rétt. Vinnuvélarnar í Baldurshaganum rumdu og stundu og erfitt var að heyra inn á milli hvort þetta væri mjálm, ímyndun í mér eða eitthvað allt annað. Ég stóð grafkyrr, þorði varla að anda og heyrði aftur fjarlægt ámátlegt mjálm. Hjartað tók kipp.

Ég náði í hundaólina og fór af stað með Kát, hélt kannski að hann gæti gefið mér merki um að Emilía væri einhversstaðar í nágrenninu. Ég gekk norður Brekkugötuna og fyrir hornið og inn götuna fyrir ofan. Þar gekk ég í pilsinu mínu með stóran svartan hund í bandi og kallaði"kis kis" alveg eins og bjáni.

Þar kom ég að bílskúr sem liggur að lóðinni okkar og gekk að honum áfram kallandi "kis kis" og viti menn mér var svarað með mjálmi. Ég hafði farið og fengið nágrannana til að opna skúrinn fyrir rúmri viku en ekki orðið vör við köttinn. Það eru tveir eigendur að skúrnum og sem betur fer var Jónas vinur okkar í húsinu fyrri ofan heima og opnaði fyrir mig sinn helming. Þar var enginn köttur en áfram heyrðist mjálmað. Sem betur fer var skúrinn við hliðina á opinn og við fórum inn og áfram hélt mjálmið. Þar inni var tjaldvagn og við Jónas fórum að leita og leita, losuðum um seglið á tjaldvagninum og viti menn upp spratt Emilía bara bísperrt. Ég greip hana upp, þrýsti henni að mér og fór bara að gráta. Þar sem ég stóð þarna háskælandi með tárin lekandi niður kinnarnar (enn með hundinn í bandi) sjúgandi upp í nefið (ég er með örlítið kattarofnæmi sem hjálpaði ekki til) báru tilfinningarnar mig hreint ofurliði. Jónasi blessuðum leist örugglega ekki á granna sinn hágrátandi í bílskúr með kött í fanginu og hund í bandi. En hann reyndist mér virkilega vel.

Ég fór til Kristínar grannkonu því Emilía er mikil vinkona hennar til að láta hana vita og biðja hana að líta eftir kettinum því ég þurfti auðvitað í vinnuna. Þarna vorum við vinkonurnar virkilega hrærðar á meðan Emilía gekk um og heimtaði mat.

Þvílíkur morgunn, svo sest maður bara eins og venjulega við tölvuna, hlýtt um hjartaræturnar því Emilía er fundin og reynir að snúa sér að amstri hversdagsins.