Lára Stefánsdóttir

Er raunveruleikinn hjá þessari ríkisstjórn þannig að menn rubbi bara af eins og einni tveimur lagasetningum, kasti þeim í gegnum þingið og svo eigum við alþýða Íslands að lifa og vera dæmd eftir þeim. Ég trúði því að menn vönduðu undirbúning laga í ráðuneytum, ráðherra legði frumvarp að lögum fyrir Alþingi. Málið færi í nefnd þar sem eins mörgum sem þekkja til málsins eða þurfa að búa við lögin fremur en aðrir boðið að segja álit. Álitið tekið fyrir í nefndi milli fyrstu og annarrar umræðu. Frumvarpið endurskoðað og jafnvel breytt og lagt aftur fyrir Alþingi. Enn og aftur færi málið í nefnd og síðan til atkvæðagreiðslu. Tja eða þá ef enginn ágreiningur er þá gangi það liprar og hraðar á seinni stigum. En ég er líklega bara pólitískur einfeldningur miðað við orð forsætisráðherrans. Frumvörpin eru stundum bara samin í "hendingskasti" og þetta er okkur boðið uppá.

Ég verð allavega að viðurkenna að ég er farin að sakna gamalla og góðra Framsóknarmanna úr pólitík, þessir grænklónuðu frjálshyggjusjálfstæðismenn sem þykjast vera Framsóknarmenn í dag eru einfaldlega eins og sál í skökkum líkama. Menn sem lifðu fyrir landið og af landinu hafa orðið að láta í minni pokann.

Það verður fróðlegt að fylgjast með hverjir tína upp spilin sem forsætisráðherrann missti í gólfið og hvort íslenska þjóðin þarf að sitja uppi með ríkisstjórn sem er jafn rótlaus og án festu þegar virkilega þarf að halda vel á spilunum.