Laugardagur 14. október 2006
Börnin heim
Fyrir þá sem ekki búa nálægt framhaldsskóla er ekki um annað að ræða en senda börnin sín að heiman 16 ára gömul til að þau njóti menntunar. Ég hef í starfi oft tekið á móti þessum börnum sem eru að stíga sín fyrstu skref að heiman. Ég man eftir hæglátu stúlkunni sem grét því hana langaði heim, drengnum sem var svangur og vissi ekki hvernig hann átti að þvo fötin sín. Stúlkunni sem hallaði sér að langtum eldri manni sem "hugsaði um hana" þegar hún var farin að heiman. Drengnum sem vildi vera flottastur og var fullur allar helgar. Einmanaleikinn var þeim öllum sameiginlegur. Auðvitað á þetta ekki við um öll börn sem fara snemma að heiman, en eitt eiga þau sameiginlegt, fjölskyldan getur ekki verið þeim sami bakhjarl og þeim sem búa heima hjá sér.
Lesa meira af "Börnin heim"
Skrifað af Lára kl. 00:39
| Álit (0)
| Tilvísanir (0)
Miðvikudagur 11. október 2006
Ósjálfstæðisflokkurinn?
Nú berast okkur þau tíðindi að sími fyrrum utanríkisráðherra landsins Jóns Baldvins Hannibalssonar hafi verið hleraður og honum hafi verið kunnugt um það. Aðspurður um hvort hann hafi ekki íhugað kæru svaraði með þeirri spurningu hvert hann hefði átt að kæra?
Þarna kemur einmitt stóra spurningin, hvert getur utanríkisráðherra landsins kært brot á sér? Hann er ráðherra á þessum tíma í fyrstu ríkisstjórn Davíðs Oddssonar og upplifði greinilega að hann gæti ekki sótt sér þjónustu opinberrar löggæslu sem var undir stjórn Þorsteins Pálssonar sem dómsmálaráðherra.
Var sumsé utanríkisráðherra Alþýðuflokksins í þeirri stöðu að þurfa að þola símhleranir vegna þess að Sjálfstæðisflokkurinn var beinlínis búinn að framselja innri öryggismál þjóðarinnar? Var það, og er það þá ennþá þannig, að Sjálfstæðisflokkurinn gefi einhverjum heimild til að hlera æðstu ráðamenn landsins? Svo ég spyrji nú bara einfaldrar spurningar - má það??? Hefur Sjáfstæðisflokkurinn haft aðgang að einhverri leyniþjónustu og með brotthvarfi hersins sé þá gripið til þeirra ráða að stofna innlenda þjónustu til að sinna fyrri verkum? Ég er dálítið furðu lostin í þessu máli, þarna er mörgum spurningum ósvarað.
Skrifað af Lára kl. 12:07
| Álit (2)
| Tilvísanir (0)
Þriðjudagur 10. október 2006
Fjölskyldan í forgang
Tímaskortur, hraði, afköst, árangur eru hugtök sem við heyrum nánast daglega. Við hættum að verða vör við þau og lífið taktar hraðar og hraðar án þess að við náum að staldra við og huga að því sem mestu skiptir - fjölskyldunni. Fjölskyldan verður að hafa tíma til þess að vera saman, foreldrar vilja njóta samvista hvort við annað og börnin sín en tíminn til þess verður minni og minni. Orsakirnar eru fjölmargar, atvinna foreldra, eðlileg áhersla á frama í starfi, tímafrekar ferðir milli staða og margt fleira. Ég tel að það sé eitt mikilvægasta mál stjórnmálanna í dag að gera fjölskyldunni kleift að vera hornsteinn samfélagsins, en ekki einungis þess heldur hornsteinn í lífi fólks. Nánast allir málaflokkar tengjast þessu viðfangsefni og það er tími til kominn að fjölskyldan sé sett í forgang.
Skrifað af Lára kl. 08:43
| Álit (1)
| Tilvísanir (0)
Mánudagur 9. október 2006
Egilsstaðir og Húsavík
Í gær (sunnudag) fórum við frambjóðendur til Egilsstaða og Húsavíkur. Ferðin var ekki síður skemmtileg en um síðustu helgi en veðrið dálítið daprara. Hinsvegar komumst við í tæri við hreindýr og ég náði að mynda dálítið, hefði verið til í að vera þar miklu lengur. Fundirnir eru hinsvegar að verða miklu skemmtilegri, frambjóðendur komnir í góðan gír í baráttunni sem er hin skemmtilegasta. Nú eru ekki fundir fyrr en aðra helgi en þá í Siglufirði og á Akureyri. Nú er bara að vinna hörðum höndum til að ná kjöri - öll góð ráð vel þegin;-)
Skrifað af Lára kl. 01:51
| Álit (0)
| Tilvísanir (0)
Knúið af
Movable Type 2.661