Ljósmyndir - Photography | Tónlist - Music | CV in English

Um mig

Ég heiti Lára Stefánsdóttir. Ég er fædd í Reykjavík þann 9. mars 1957.
Ég ólst upp í Reykjavík, á Sjafnargötunni og í Safamýri og gekk í Álftamýrarskóla. Í níu sumur var ég í sveit og síðar vinnumaður á Neðri Rauðalæk á Þelamörk í Hörgárbyggð þar sem ég á lítið kot í dag. Mig dreymdi um að verða bóndi og vildi ævinlega vera út á landi helst í sveit. Ég sóttist því eftir því að vera í skóla úti á landi, fyrst fór ég í Hlíðardalsskóla 14. ára gömul, síðan að Laugum í Reykjadal veturinn 1973-1974 og þaðan í Samvinnuskólann að Bifröst 1974-1976.

Árið 1977 réðist ég til Landssambands íslenskra rafverktaka (LÍR) og Söluumboðs LÍR, þar vann ég fyrst við almenn skrifstofustörf og innheimtu en frá 1979-1985 sá ég um innflutning og sölu á raflagnaefni. Árið 1980 kynntist ég tölvum hjá Söluumboði LÍR og fór fljótt að sjá um tölvu fyrirtækisins, forritun og fleira.

Ég réðist síðan til Microtölvunnar 1986 í almenna tölvuþjónustu, einfaldar viðgerðir og viðhald hugbúnaðar. Síðan sem framkvæmdastjóri Axel hugbúnaðar 1987-1988. Á sama tíma stundaði ég nám við HÍ og tók þar áfanga í tölvunarfræðum. Árið 1988 fór ég að kenna við Fjölbrautaskólann við Ármúla (FÁ) í hlutastarfi og lauk prófi í kerfisfræði frá Tölvuháskóla VÍ vorið 1989. Síðan kenndi ég tölvufræði við FÁ til vorsins 1992. Lauk síðan prófi í uppeldis og kennslufræði frá Háskóla Íslands 1992, 30 eininga framhaldsnámi í uppeldis- og menntunarfræðum 1999 og meistaraprófi vorið 2002 með rannsóknarverkefni um fartölvur í námi og kennslu í Menntaskólanum á Akureyri.

Vorið 1992 fór ég í samstarf við Pétur Þorsteinsson frá Kópaskeri en við stofnuðum Íslenska menntanetið ásamt Birni Þór Jónssyni og Jóni Eyfjörð. Hófst þá mikið ævintýratímabil við að sannfæra íslenskt menntafólk um að nota Internetið. Þar var ég til ársins 1995 er ég fór að starfa sjálfstætt við sérfræðivinnu í tengslum við upplýsingatækni og menntun. Það gerði mér síðan kleift að flytja til Akureyrar 1996 og uppfylla þar með langþráðan draum um að komast út á land því vinnan mín var öll á Netinu og hægt að vinna hvaðan sem var.

Árið 1998 tók ég við starfi sem deildarstjóri upplýsingatæknideildar Menntaskólans á Akureyri til að byggja upp hagnýtingu upplýsingatækni í skólanum. Þegar því verkefni lauk 2001 fór ég aftur að vinna sjálfstætt en fór síðan að vinna hjá tölvufyrirtækinu Þekkingu haustið 2002, þegar þeir eigendur keyptu tölvufyrirtækið Stefnu fór ég þangað sem verkefnisstjóri. Eigendurnir keyptu síðan Tölvuskólann Þekkingu og varð ég þá framkvæmdastjóri hans vorið 2006.


Ég var formaður 3F - Félags um upplýsingatækni og menntun 1990 - 1992 og síðan aftur frá árinu 2000. Einnig hef ég verið í norrænum nefndum á vegum menntamálaráðuneytisins, um Norrænt skólanet (1994-1995), Fullorðinsfræðslu og nýja tækni (1992-1994), IDUN I og II (informationsteknologi og datapedagogik i undervisningen) 1995-2001).

Ég hef tekið þátt í Kidlink samskiptaverkefninu frá 1992, var meðstofnandi Kidlink Society 1996 og í stjórn þess fyrir hönd Evrópu frá 1996-1998. Aðstoðarstjórnandi verkefnisins 1995-1999.
Markmið verkefnisins er að gera ungmennum um allan heim tækifæri til að kynnast og læra saman. Börn frá 152 löndum hafa tekið þátt í Kidlink frá upphafi 1992, við höfum 86 umræðusvæði á 19 tungumálum. Kidlink verkefnið hefur hlotið verðlaunin "The Cyber Golden Hearts" Online Learning Award of Special Merit from SIGTel/ISTE (May 2002). Fyrstu verðlaun í Global Junior Challenge (2000): "Educational projects for users up to 18 years old". Fyrstu verðlaun í the Global Bangemann Challenge's "IT in all kinds of education" (1999). Alþjóðabankinn styrkir Kidlink í Brasilíu (2001). Menntamálaráðuneyti Bandaríkjanna mælir með Kidlink í "Teacher's Guide to International Collaboration on the Internet."

Ég hef haldið fyrirlestra um hagnýtingu upplýsingatækni og sérstaklega Netsins hér heima á Íslandi sem og á Álandseyjum, í Bandaríkjunum, Brasilíu, Bretlandi, Danmörku, Færeyjum, Noregi, Perú, Puerto Rico, Rúmeníu, Slóveníu og Svíþjóð. Einnig hef ég heimsótt KHouse sem eru verkefni okkar með götubörnum í Brasilíu og Mexíkó.

Auk ofantalins má nefna verkefni sem ég hef unnið (stór og smá) sem hafa m.a. verið fyrir: BBC, Endurmenntunarstofnun HÍ, Framvegis, Heimili og menntir, Íslenska menntanetið, Leikskólann Klappir, Menntaskólann á Akureyri, Menntamálaráðuneytið, Menntaskólann við Hamrahlíð, MIRK (Slóvneskt fyrirtæki, samstarf kennara og menntamálaráðuneytis Slóvena), Telia (sænskt símafyrirtæki) o.fl.

Árið 2003 tók ég þátt í prófkjöri Samfylkingarinnar í norðausturkjördæmi og tók þá þriðja sæti á lista fyrir alþingiskosningarnar. Sama ár sat ég á þingi sem fyrsti varaþingmaður og gat þar nýtt reynslu mína og áhuga á menntamálum, samgöngumálum og tækni og flutti þar nokkur mál.
Ég ákvað að bjóða mig fram í annað sæti á lista Samfylkingarinnar fyrir alþingiskosningarnar 2007 því ég hef mikinn áhuga og metnað til þess vinna fyrir fólkið í landinu og gera samfélagið okkar betra.

Ég var gift Gísla Gíslasyni frá Ólafsfirði okkar börn eru Hilda Jana Gísladóttir fréttamaður á RÚV og Gísli Tryggvi Gíslason verslunarstjóri Samkaupa á Blönduósi. Einnig á ég þrjár ömmustelpur, Hrafnhildi Láru, Ísabellu Sól og Sigurbjörgu Brynju. Frábær tengdabörn þau Ingvar Má Gíslason markaðsstjóra hjá Norðlenska og Söndru Kristinsdóttur nema.

Fyrir þá sem hafa áhuga á ættfræði þá eru móðurforeldrarnir frá Snæfellsnesi, Magnfríður Sesselja Sigurbarnardóttir sem vann í mötuneyti á Blaðaprent frá Hellnum og Tryggvi Bjarni Elímundur Kristjánsson sjómaður frá Ólafsvík. Föðurforeldrarnir eru síðan Lára Jóhannsdóttir frá Sveinatungu í Borgarfirði lífskúnstner og kremgerðarkona og Jóhann Gunnar Stefánsson framkvæmdastjóri Olíufélags Íslands (Esso) sem fæddist á Hvammstanga.

Systkinin eru tvö, Fríður Birna Stefánsdóttir (Fífa) sem vinnur hjá Maritech og Jóhann Gunnar Stefánsson framkvæmdastjóri hjá Háfelli.

Síðan má ekki gleyma heimilisdýrunum, hundinum Káti Mikla Kolbeinssyni sem heitir Kátur því allir hundar í sveitinni hétu Kátur, Mikli af því hann fannst á Miklubrautinni og Kolbeinsson eftir uppáhaldssögupersónunni í Tinnabókunum. Síðan er á heimilinu kötturinn Emilía sem bæði veiðir hettumáf og rjúpu.

Helstu áhugamálin eru tengd handverki ýmiskonar s.s. keramik og glerbræðslu en mest ljósmyndun en ég ferðast mikið til að taka myndir. Einnig finnst mér gaman að vera í kotinu mínu að Rjúpnaholti, rækta tré, og semja tónlist. Ég les gríðarlega mikið í frístundum og þá helst bækur eftir Tolkien, Rawlings, Jordan, Goodkind o.fl. sem skrifa ævintýri. Það er góð hvíld eftir lestur fræðibóka ég á jafnvel til með að lesa góða bók oft.


Lára Stefánsdóttir
Brekkugata 43
600 Akureyri
Ísland / Iceland
GSM: +896-3357
lara@lara.is

Lára Stefánsdóttir lara[at]lara.is

Vefdagbók - Flokkar Dýrin Ferðalög Frétt Kidlink Ljósmyndun Menntun Pólitík Rjúpnaholt Tilveran Um blogg UT Vinnan Ymislegt

www.flickr.com

Áskrift að vefdagbók